श्री गणेशाय नम: । श्री गुरुभ्यो नम: । श्री कुलदेवताभ्यो नम: । श्री महालक्ष्म्यै नम: । श्री सरस्वत्यै नम: ॥ गुरु श्री. चैतन्य मूर्ती । दिनरात चैतन्य अंगी ॥ उत्साह रोमरोमी । दत्त अवतारी ही मूर्ती ॥1॥ काळवेळ न त्यासी । केव्हाही या दर्शनासी ॥ प्रत्येकाचे प्रश्न भिन्नचि । योग्य मार्गदर्शन प्रत्येकासी ॥2॥ रडार विमान तळी । घेई नोंद प्रत्येक विमानी ॥ तसेच गुरु शक्तीतूनी । अचूक उत्तरे त्याचे त्यासी ॥3॥ प्रसन्नता दिनरात मनी । प्रसन्नतेतून सर्व कांही ॥ पाहता प्रसन्न मूर्ती । दर्शने होतो प्रसन्न मनी ॥4॥ दगडाची मूर्ती देऊळी । उभी असते मंदिरी ॥ तसेच ही गुरु मूर्ती । कंटाळा नसे भक्तासाठी ॥5॥ कोठूनी येते शक्ती । अदृश्य सृष्टी कार्य निश्चिती ॥ कसे काय कोठूनी । सांगणे कठीण या क्षेत्री ॥6॥ जरी वय श्याहएेंशी । उन्हाळा न सोसवी ॥ थकवा अत्यंत शरीरी । तरी चर्चा सतत भक्तासी ॥7॥ कोणा न कळे त्यातूनी। गुरु असती आजारी ॥ प्रत्येकाचे समाधान होऊनी । परत जाती दत्तवाडीहूनी ॥8॥ अनुभव सतत प्रत्येकी । ज्याचे त्याला देती ॥ सर्वाभूती लक्ष क्षणोक्षणी । वर्णना पलीकडे सर्व ॥9॥ अनुभव उपाय त्यावरी । श्रध्दा मूळ असे जरी ॥ लीन होऊनी गुरु चरणी । गाऊ द्या या अध्यायासी॥10॥ गुरु हेच परब्रह्म । गुरु हेच दत्त ॥ गुरु हेच सर्वस्व । गुरु प्रेम अतूट ॥11॥ गुरु भेट होण्यासी । कारण पाहिजे प्रबलचि॥ मन नाजूक संकटी । मनी संस्कार योग्य या वेळी ॥12॥ अविनाश देशपांडे नामी । एक शिष्य अकोल्यासी ॥ वडील सदाशिव असती । माता सुशिला त्यांची ॥13॥ कोण जाणतो संचितासी । फल येते नशिबी ॥ हे सत्य तत्त्व जीवनी । घटने कळते त्यासी ॥14॥ टाळता न टळे तेही । कर्माची अजब गती ॥ क्षणात घडे सर्वही । पूर्व सूचना न उपयोगी ॥15॥ घटना लग्नानंतरी । गुरुवार भानुदये उठूनी ॥ पूजा केली दत्तात्रेयाची। कार्यालयी प्रारंभ कार्यासी ॥16॥ घटना घडली एकदमचि । अविनाश कॉऊंटरवरती ॥ अपरिचित व्यक्ती कोणी । चोरी केली त्यांनी ॥17॥ फ्रॉड म्हणती आंग्लभाषी । मराठीत म्हणा चोरी ॥ फसवणूक म्हणा त्यासी । घडले मात्र निश्चित ॥18॥ रक्कम नसे लहान सहान। पंचाएेंशी हजाराचा फ्रॉड ॥ धाबे दणाणले सर्व । संकटी कोणी न साथी ॥19॥ ग्रह बल नाही म्हणून । ऐकण्या न कोणी तयार ॥ आरोप आला त्यावर । निलंबीत केले कामावरुन ॥20॥ बँकेचे अधिकाऱ्यासी । विश्वास न त्याचेवरी ॥ तक्रार नोंदविली त्यांनी । पोलीस कार्यालयी ॥21॥ पोलीसांची रीत आगळी । छडा लावण्याची पध्दती ॥ नित्य मारहाण करिती । कबूल करण्या सांगती ॥22॥ चोरीच नव्हती केली । कबूल कसे मारुनी ॥ कबूली नाही म्हणूनी । पोलीस कस्टडी त्यासी ॥23॥ कस्टडी नसे एकदिनी । पंधरा दिवस कस्टडी॥ त्या हाल अपेष्टेसी। वर्णन नाही शब्दी ॥24॥ ऐशा प्रयत्नातूनी । गुन्हेगारी येते हाती ॥ ऐशी प्रथा त्यांची । दोष न त्यांचा कांही ॥25॥ अविनाश आरोपी । संशय होता त्याच्यावरी ॥ कबूल करणे अशक्यचि । त्याने कष्ट अधिक ॥26॥ सहन करणे कठीणचि । श्रध्दा गुरु दत्तात्रेयावरी ॥ सहन करण्या शक्ती । दिली गुरु दत्तात्रेयांनी ॥27॥ अश्रू येती रोज नयनी । काटे येती अंगावरी ॥ कोणते संचित फळासी । काही न कळे मनासी ॥28॥ गुरुचरित्र पठण मती । ढळली नाही अशा संकटी ॥ शक्ती मिळाली मनी । धैर्य मिळाले वेळोवेळी ॥29॥ पोलीस केस न्यायालयी । सुरु झाली चक्री ॥ जावे तारखेवरी । बदलून मिळे दुसरी ॥30॥ वकील न उत्सुक कोणी । यश नाही म्हणती ॥ नकार प्रत्येक कार्यी । सहानुभूती शून्यता कुठेही ॥31॥ सूचेना मना काही । कुंडली अनेका दिली ॥ बिकट काल आजी । भविष्याची काय खात्री ॥32॥ अनेकाकडे जाऊनी। समाधान नाही मनासी ॥ खात्री न यशाची । भाव फक्त दत्तात्रेयावरी ॥33॥ ऐकले होते कानी । गुरु येती शेजारी ॥ भेटी नव्हती आधी। योग नव्हता आधी ॥34॥ अकोल्यासी शिष्या घरी । गुरु येती कितीवेळी ॥ इच्छा न झाली कधी । दर्शना न गेले कधी ॥35॥ योग आल्यावाचून। सत्पुरुष दर्शन अशक्य ॥ काळवेळ आल्यावाचून । मार्गदर्शन अशक्य ॥36॥ योगायोग म्हणा तुम्ही । अदृश्य सृष्टी योजना ती ॥ विद्युत बील देण्यासी । दोघेही कसे एक क्षणी ॥37॥ प्रेरणा अविनाश मनी । विचारिले शिष्यासी ॥ गुरु येती तुझ्या घरी । इच्छा आहे दर्शनाची॥38॥ गुरु आले चवथे दिनी । निरोप शिष्या कडूनी ॥ दर्शना आले सर्वही । खात्री वाटली यशाची ॥39॥ अरिष्ट कथिले गुरुसी । विनंती केली सुटकेची॥ द्रवले गुरुचे मन अंतरी । उपाय सुचविला तात्काळ ॥40॥